ಹನಿಟ್ರ್ಯಾಪ್ ಯುವತಿಗೆ ರಾಜಣ್ಣ ಕಪಾಳ ಮೋಕ್ಷ !

ಬೆಂಗಳೂರು:ಹನಿಟ್ರ್ಯಾಪ್‌ಗೆ ಯತ್ನಿಸಿದ ಯುವತಿಗೆ ಸಹಕಾರಿ ಸಚಿವ ಕೆ.ಎನ್.ರಾಜಣ್ಣ ಕಪಾಳ ಮೋಕ್ಷ ಮಾಡಿದ್ದರಂತೆ.

ರಾಜಣ್ಣ ದೂರು ಆಧರಿಸಿ ಮಾಹಿತಿ ಸಂಗ್ರಹ ವೇಳೆ ಸಿಐಡಿ ಡಿಐಜಿ ವಂಶಿಕೃಷ್ಣ, ಎಸ್‌ಪಿ ರಾಘವೇಂದ್ರ ಹೆಗಡೆ ನೇತೃತ್ವದ ಅಧಿಕಾರಿಗಳ ಮುಂದೆ ಸಚಿವರ ಮನೆಯ ಸಿಬ್ಬಂದಿಯಿಂದ ಈ ವಿಷಯ ಬಹಿರಂಗವಾಗಿದೆ.

ಜೀನ್ಸ್ ತೊಟ್ಟ ಯುವತಿ

ಸಚಿವರ ಜೊತೆ ಖಾಸಗಿಯಾಗಿ ಮಾತನಾಡಬೇಕು ಎಂದು ಜೀನ್ಸ್ ತೊಟ್ಟ ಯುವತಿ ಮನವಿ ಮಾಡಿದ್ದಳು, ಇದು ಒಂದು ಬಾರಿಯಲ್ಲ, ಎರಡು, ಮೂರು ಬಾರಿಯಾಗಿತ್ತು, ಎಲ್ಲಾ ಸಂದರ್ಭದಲ್ಲೂ ಸಚಿವರು ನಿರಾಕರಣೆ ಮಾಡಿದ್ದರು.

ಎರಡನೇ ಬಾರಿಗೆ ಬಂದಿದ್ದ ಯುವತಿ ಸಚಿವ ರಾಜಣ್ಣ ಅವರ ತೀರಾ ಸನಿಹಕ್ಕೆ ಬಂದು ಕೈಹಿಡಿದು ಬಲವಂತವಾಗಿ ಮಾತನಾಡಿಸಲು ಮುಂದಾದಳು.

ಅಪರಿಚಿತ ಯುವತಿ ಒಮ್ಮೆಲೇ ಕೈಹಿಡಿಯುತ್ತಿದ್ದಂತೆ ಸಿಟ್ಟಿಗೆದ್ದ ರಾಜಣ್ಣ, ಆಕೆಗೆ ಕಪಾಳ ಮೋಕ್ಷ ಮಾಡಿದರು, ಆಗ ಗಡ್ಡಧಾರಿ ಯುವಕನೊಂದಿಗೆ ಬಂದಿದ್ದ ಆ ಯುವತಿ ಅಲ್ಲಿಂದ ಕಾಲ್ಕಿತ್ತಳು.

ಗಡ್ಡಧಾರಿ ಯುವಕ

ಯುವತಿಯರು ಎರಡು ಬಾರಿ ಬಂದಾಗಲೂ ಗಡ್ಡಧಾರಿ ಯುವಕನೊಬ್ಬ ಜೊತೆಗಿದ್ದ, ಆದರೆ, ಗಡ್ಡಧಾರಿ ಯುವಕ ಯಾರೆಂಬುದು ತಿಳಿದಿಲ್ಲ ಎಂದಿದ್ದಾರೆ.

ಇದನ್ನೇ ರಾಜಣ್ಣ ಅವರು ತಮ್ಮ ದೂರಿನಲ್ಲೂ ತಿಳಿಸಿ, ಆ ತಂಡವನ್ನು ಗುರುತಿಸಬಲ್ಲೇ ಎಂದು ಹೇಳಿದ್ದರು.

ಸಚಿವರು ಉಲ್ಲೇಖಿಸಿರುವ ಸ್ಥಳಗಳಿಗೆ ಇಂದು ಅಧಿಕಾರಿಗಳ ತಂಡ ಭೇಟಿ ನೀಡಿ ಮಾಹಿತಿ ಸಂಗ್ರಹಕ್ಕೆ ಕಸರತ್ತು ನಡೆಸಿತು.

ಸ್ಥಳದಲ್ಲಿ ಇದ್ದವರು ಯಾರು

ಘಟನೆ ನಡೆದ ದಿನ, ಸ್ಥಳದಲ್ಲಿ ಇದ್ದವರು ಯಾರು ಎಂಬ ಮಾಹಿತಿಯನ್ನು ಸಂಗ್ರಹಿಸಲಾಗುತ್ತಿದೆ.

ಸಚಿವರ ಓಎಸ್‌ಡಿ, ಪಿಎ, ಪಿಎಸ್, ಗನ್‌ಮ್ಯಾನ್, ಸೆಕ್ಯೂರಿಟಿ ಹಾಗೂ ಮನೆ ಸಿಬ್ಬಂದಿಗಳಿಂದ ಮಾಹಿತಿ ಸಂಗ್ರಹಿಸಲಾಯಿತು.

ಸಚಿವರ ಮನೆಯಲ್ಲೇ ಸಿಸಿಟಿವಿ ಇಲ್ಲದ್ದನ್ನು ಕೇಳಿ ಅಧಿಕಾರಿಗಳಿಗೆ ಶಾಕ್ ಆಗಿದ್ದು, ಅವರ ಸರ್ಕಾರಿ ನಿವಾಸಕ್ಕೆ ಬಂದು-ಹೋಗುವವರ ಮೇಲೆ ಯಾವುದೇ ಕಣ್ಗಾವಲು ಇಲ್ಲ, ಹೀಗಾಗಿ ಸಚಿವ ರಾಜಣ್ಣ ಮನೆಯ ಸುತ್ತಮುತ್ತಲ ಪ್ರದೇಶದ ಸಿಸಿಟಿವಿಗಳಿಂದ ದೃಶ್ಯಗಳನ್ನು ಸಂಗ್ರಹಿಸುವ ಯತ್ನ ನಡೆದಿದೆ.

ದೃಶ್ಯ ಸಂಗ್ರಹಕ್ಕೆ ಪ್ರಯತ್ನ

ಮಾರ್ಚ್‌ನ ಮೊದಲ ವಾರದಲ್ಲಿ ಹಾಗೂ ತದನಂತರದ 15 ದಿನಗಳಲ್ಲಿ ಈ ಪ್ರಯತ್ನಗಳು ನಡೆದಿದ್ದು, ಈ ದಿನಗಳ ದೃಶ್ಯ ಸಂಗ್ರಹಕ್ಕೆ ತಂಡ ಪ್ರಯತ್ನಿಸುತ್ತಿದೆ.

ದೂರಿನಲ್ಲಿ ಘಟನೆಗಳ ಸ್ಪಷ್ಟತೆ ಇಲ್ಲದಿರುವುದರಿಂದ ಸಚಿವರಿಗೇ ನೋಟಿಸ್ ನೀಡಿ ಮಾಹಿತಿ ಪಡೆಯಲು ಅಧಿಕಾರಿಗಳು ನಿರ್ಧರಿಸಿದ್ದಾರೆ ಎನ್ನಲಾಗಿದೆ.