ಬೆಂಗಳೂರು:ಎಸ್‌ಐಟಿ ಕಸ್ಟಡಿಗೆ ವಹಿಸುವ ಮುನ್ನ ಪ್ರಜ್ವಲ್ ರೇವಣ್ಣ ಬಂಧನಕ್ಕೊಳಗಾದಾಗ ಆತನನ್ನು ಇರಿಸಿದ್ದ ಅದೇ ಲಾಕ್‌ಅಪ್‌ನಲ್ಲಿ ಈಗಲೂ ಇರಿಸಲಾಗಿದೆ.
ಕಸ್ಟಡಿಗೆ ಪಡೆದ ನಂತರ ಅದೇ ರೂಂನಲ್ಲಿ ಉಳಿದುಕೊಳ್ಳಲು ವ್ಯವಸ್ಥೆ ಮಾಡಲಾಗಿದೆ, ನಿನ್ನೆ ಕೋರ್ಟ್‌ನಲ್ಲಿ, ರೂಂ ಕ್ಲೀನ್ ಇಲ್ಲ, ಸ್ಮೆಲ್ ಬರ್ತಿದೆ ಅಂದಿದ್ದ ಪ್ರಜ್ವಲ್, ನಿನ್ನೆ ಅದೇ ರೂಂನ ಅದೇ ವ್ಯವಸ್ಥೆಯಲ್ಲಿ ರಾತ್ರಿ ಕಳೆಯಬೇಕಾಯಿತು.
ಉಳಿದುಕೊಳ್ಳಲು ಪ್ರಜ್ವಲ್‌ಗೆ ಯಾವುದೇ ರೂಂ ಬದಲಾವಣೆ ಮಾಡದ್ದರಿಂದ ಅದೇ ಕೊಠಡಿಯ ಅದೇ ಶೌಚಾಲಯ ಬಳಕೆ ಮಾಡುವ ಸ್ಥಿತಿ ಎದುರಾಗಿದೆ.
ಬೇರೆ ಕೊಠಡಿಗೆ ಮನವಿ
ಕೋರ್ಟ್‌ನಲ್ಲಿ ನಿನ್ನೆ ನ್ಯಾಯಾಧೀಶರ ಮುಂದೆ ಮನವಿ ಮಾಡಿಕೊಂಡಿದ್ದ ಪ್ರಜ್ವಲ್, ರೂಂ ಕೆಟ್ಟ ವಾಸನೆ ಬರ್ತಿದೆ, ಬೇರೆ ಕೊಠಡಿ ಮಾಡಿಸಿಕೊಡಿ ಎಂದು ಮನವಿ ಮಾಡಿಕೊಂಡಿದ್ದ.
ನಿನ್ನೆ ರಾತ್ರಿ ಊಟ ಮಾಡಿದ ನಂತರ ಕೆಲವು ಸಮಯದ ಬಳಿಕ ನಿದ್ದೆಗೆ ಜಾರಿದ ಪ್ರಜ್ವಲ್‌ನನ್ನು ಇಂದು ಇಡೀ ದಿನ ಎಸ್‌ಐಟಿ ಅಧಿಕಾರಿಗಳು ವಿಚಾರಣೆಗೆ ಒಳಪಡಿಸಿದರು.
ಅತ್ಯಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಿನ್ನೆ ಜನಪ್ರತಿನಿಧಿಗಳ ನ್ಯಾಯಾಲಯ ಆರು ದಿನದವರೆಗೆ ಎಸ್‌ಐಟಿ ವಶಕ್ಕೆ ನೀಡಿತ್ತು.
ಎಸ್‌ಐಟಿ ಪೊಲೀಸರಿಗೇ ಪ್ರಶ್ನೆ
ವಿಚಾರಣೆ ಸಂದರ್ಭದಲ್ಲಿ ಆತ, ಇತ್ತೀಚೆಗೆ ನಡೆದಿರುವ ಯಾವ ಘಟನೆಗಳೂ ನನಗೆ ಗೊತ್ತಿಲ್ಲ, ನನ್ನದು ಎಂದು ಹೊರಬಂದಿರುವ ನಗ್ನ ಚಿತ್ರಗಳಿಗೂ ನನಗೂ ಸಂಬಂಧ ಇಲ್ಲ, ನೀವು ಏತಕ್ಕೆ ಈ ಎಲ್ಲಾ ಪ್ರಶ್ನೆಗಳನ್ನು ಕೇಳುತ್ತಿದ್ದೀರಿ ಎಂದು ಎಸ್‌ಐಟಿ ಪೊಲೀಸರನ್ನೇ ಪ್ರಶ್ನಿಸಿದ್ದಾರೆ.
ವಿಚಾರಣಾ ಸಂದರ್ಭದಲ್ಲಿ ನನಗೆ ಗೊತ್ತಿಲ್ಲ, ಏನೂ ತಿಳಿದಿಲ್ಲ, ನನಗೂ ಅದಕ್ಕೂ ಸಂಬಂಧವಿಲ್ಲ, ಮಹಿಳೆ ನನಗೆ ಯಾರೆಂದೇ ತಿಳಿದಿಲ್ಲ ಎಂದು ಉತ್ತರಿಸಿದ್ದಾರೆ.
ಕೊನೆಗೆ ಅಧಿಕಾರಿಗಳು ಅತ್ಯಾಚಾರ ಆರೋಪದ ದೂರು ನೀಡಿರುವ ಮಹಿಳೆಯ ಚಿತ್ರ ತೋರಿಸಿದ ಸಂದರ್ಭದಲ್ಲಿ, ನಮ್ಮ ಮನೆಗಳು, ತೋಟ, ಕಚೇರಿಗಳಲ್ಲಿ ಬಹಳಷ್ಟು ಮಂದಿ ಕೆಲಸ ಮಾಡುತ್ತಾರೆ, ನನಗೆ ಎಲ್ಲರ ಪರಿಚಯ ಮತ್ತು ಚಿತ್ರಣ ಇಲ್ಲ.
ಕಾರ್ತಿಕ್‌ಗೆ ಪ್ರಶ್ನಿಸಿದರೆ ಎಲ್ಲವೂ ತಿಳಿಯುತ್ತೆ
ಈ ಹೆಣ್ಣಿನ ಬಗ್ಗೆ ನನ್ನ ಕಾರ್ ಡ್ರೈವರ್ ಆಗಿದ್ದ ಕಾರ್ತಿಕ್‌ಗೆ ತಿಳಿದಿರಬಹುದು, ಅವನನ್ನು ನೀವು ಇದುವರೆಗೂ ಬಂಧಿಸಿಲ್ಲವೇ, ಅವನನ್ನು ಪ್ರಶ್ನಿಸಿದರೆ ನಿಮಗೆ ಎಲ್ಲವೂ ತಿಳಿಯುತ್ತದೆ ಎಂದಿದ್ದಾರೆ.
ನಂತರ ಮೊಬೈಲ್ ಮತ್ತು ಅದರಲ್ಲಿರುವ ನಗ್ನ ಚಿತ್ರಗಳ ಬಗ್ಗೆ ಪ್ರಶ್ನೆ ಮಾಡಿದಾಗ ಅದಕ್ಕೂ ನನಗೂ ಸಂಬಂಧವೇ ಇಲ್ಲ.
ನನ್ನ ಹತ್ತಿರ ಇರುವುದು ಸಾಮಾನ್ಯ ಮೊಬೈಲ್ ತೆಗೆದುಕೊಳ್ಳಿ, ನಾನು ಸಾಮಾನ್ಯವಾಗಿ ಫೋನನ್ನು ಬಳಕೆ ಮಾಡುವುದಿಲ್ಲ, ನನ್ನ ಆಪ್ತ ಸಹಾಯಕನ ಬಳಿ ಇರುವ ಫೋನಿನಲ್ಲೇ ಮಾತನಾಡುತ್ತೇನೆ.
ಸ್ಮಾರ್ಟ್ ಫೋನ್ ಕಳೆದು ಹೋಗಿದೆ
ಹಿಂದೆ ನನ್ನ ಬಳಿ ಒಂದು ಸ್ಮಾರ್ಟ್ ಫೋನ್ ಇತ್ತು, ಅದು ಒಂದು ವರ್ಷದ ಹಿಂದೆಯೇ ಕಳೆದು ಹೋಗಿದೆ, ಆ ಬಗ್ಗೆ ನಾನು ಹೊಳೆನರಸೀಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದೇನೆ, ಬೇಕಾದರೆ ವಿಚಾರಿಸಿ ಎಂದಿದ್ದಾರೆ.
ನಗ್ನ ಚಿತ್ರಗಳ ಬಗ್ಗೆ ಕೇಳಿದಾಗ ನನಗೆ ಅವರು ಯಾರೆಂದೂ ಗೊತ್ತಿಲ್ಲ, ರಾಜಕೀಯವಾಗಿ ನನ್ನನ್ನು ಮತ್ತು ನನ್ನ ಕುಟುಂಬವನ್ನು ಮುಗಿಸಲು ಕಾರ್ತಿಕ್ ಕೆಲವರ ಜೊತೆ ಕೈಜೋಡಿಸಿ ಮಾಡಿರಬಹುದು.
ಯಾರದೋ ಫೋಟೋ ತೆಗೆದು ಯಾರದೋ ಅಂಟಿಸಿರಬಹುದು, ಈಗ ಕಂಪ್ಯೂಟರ್ ಯುಗ ಅದರಲ್ಲಿ ಏನು ಬೇಕಾದರೂ ಮಾಡಬಹುದು, ನಿಮಗೆ ಎಲ್ಲಾ ತಿಳಿದಿರುತ್ತದೆ.
ನೀವು, ನನಗೆ ಕೇಳುತ್ತಿರುವ ಪ್ರಶ್ನೆಗಳನ್ನು ಕಾರ್ತಿಕ್‌ಗೆ ಕೇಳಿದರೆ ಉತ್ತರ ದೊರೆಯುತ್ತದೆ, ಅವನೇ ಇದೆಲ್ಲಾ ಮಾಡಿರಬಹುದು.
ಹೌದು, ನೀವು ಇನ್ನೂ ಏತಕ್ಕೆ ಕಾರ್ತಿಕ್‌ನನ್ನು ಬಂಧಿಸಿಲ್ಲ, ಅವನನ್ನು ಬಂಧಿಸಿದರೆ, ನಿಮ್ಮೆಲ್ಲಾ ಪ್ರಶ್ನೆಗಳಿಗೆ ಉತ್ತರ ದೊರೆಯುತ್ತದೆ ಎಂದು ಅತ್ಯಂತ ನಯವಿನಯದಿಂದ ಪ್ರಜ್ವಲ್ ಉತ್ತರಿಸಿದ್ದಾರಂತೆ.
