ಬೆಂಗಳೂರು:ಚಿತ್ರದುರ್ಗದ ರೇಣುಕಾಸ್ವಾಮಿ ಕೊಲೆ ಆರೋಪಿ ನಟ ದರ್ಶನ್ ಅವರನ್ನು ಪೊಲೀಸ್ ಠಾಣೆಯ ಕಂಬಿ ಹಿಂದೆ ಹಾಕಲಾಗಿದೆ.
ಇದುವರೆಗೂ ಠಾಣೆಯ ಮೇಲ್ಮಹಡಿಯಲ್ಲಿ ಪೊಲೀಸರ ವಿಶ್ರಾಂತಿಗಾಗಿ ಇದ್ದ ಕೊಠಡಿಯಲ್ಲಿ ದರ್ಶನ್ ಅವರನ್ನು ಇರಿಸಲಾಗಿತ್ತು.
ಮಾಮೂಲಿ ಬಂಧಿತರಂತೆ ಸೆಲ್‌ಗೆ
ಅಲ್ಲಿ ಅವರಿಗೆ ಎಲ್ಲಾ ಸವಲತ್ತುಗಳನ್ನು ಪೊಲೀಸರು ನೀಡಿದ್ದರು, ಆದರೆ, ನಿನ್ನೆ ಸಂಜೆಯಿಂದ ಠಾಣೆಯ ಲಾಕಪ್‌ನಲ್ಲಿ ಮಾಮೂಲಿ ಬಂಧಿತರಂತೆ ಇಡಲಾಗಿದೆ.
ದರ್ಶನ್ ನಿನ್ನೆ ಇಡೀ ರಾತ್ರಿ ಲಾಕಪ್‌ನಲ್ಲಿ ಸೊಳ್ಳೆಗಳ ಕಾಟದಿಂದ ನಿದ್ರೆಯಿಲ್ಲದೆ, ಇತರ ಆರೋಪಿಗಳ ಜೊತೆ ಕಳೆಯಬೇಕಾಯಿತು.
ನ್ಯಾಯಾಲಯ ನಿನ್ನೆ ಎಲ್ಲಾ ಆರೋಪಿಗಳಿಗೂ ಎರಡು ದಿನದ ಪೊಲೀಸ್ ಕಷ್ಟಡಿ ವಿಸ್ತರಣೆ ಸಂದರ್ಭದಲ್ಲಿ ನಡೆದ ವಾದ-ಪ್ರತಿವಾದದ ವೇಳೆ ದರ್ಶನ್‌ಗೆ ಪ್ರತ್ಯೇಕ ಕೊಠಡಿ ನೀಡಿರುವುದು ನ್ಯಾಯಾಧೀಶರ ಗಮನಕ್ಕೆ ಬಂದಿತು.
ಸೆಲ್‌ನಲ್ಲೇ ಇಡಬೇಕು
ಈ ಬಗ್ಗೆ ಸರ್ಕಾರಿ ವಕೀಲರನ್ನು ಪ್ರಶ್ನೆ ಮಾಡಿದ ನ್ಯಾಯಾಧೀಶರು, ಅವರೊಬ್ಬರಿಗೇನು ಪ್ರತ್ಯೇಕ ಕಾನೂನು, ಅವರನ್ನೂ ಸೆಲ್‌ನಲ್ಲೇ ಇಡಬೇಕು ಎಂದು ಆದೇಶಿಸಿದರು.
ನ್ಯಾಯಾಲಯದ ಆದೇಶದ ಹಿನ್ನೆಲೆಯಲ್ಲಿ ಪೊಲೀಸರು ಇತರ ಆರೋಪಿಗಳ ಜೊತೆ ಇವರನ್ನೂ ಕಂಬಿ ಹಿಂದೆ ಕೂರಿಸಿದರು.
